غياب كلي لمكتب نهضة الزمامرة لكرة القدم “مختفون” أم “هاربون”
عبدالإله بورزيق.
كما عودنا قراءنا الكرام ومتابعينا على أن تكون رسالتنا في 90 باللغة العامية حتى تصل الرسالة كما ينبغي دون تحريف أو تحوير للكلام.
وفي 90 اليوم تقودنا على فريق حقق الصعود الموسم الماضي إلى القسم الأول، هاد الفريق هو فريق نهضة الزمامرة لي سمعنا بأن جميع أعضاء المكتب المسير ديالو مختفون أم هاربون لا خلال المباريات لا في التداريب، وهاد الشي عرفتو من إمتا، من نهار بانت كورونا في المغرب! يعني من هداك النهار ما دارو شي اجتماع ولا بقاو بانو.
شي حاجة ماشي هي هاديك ياك؟ المهم العلم عند الله، ولكن هاد المكتب لي اختفى دون سابق إنذار ولا انساحب من التسيير دون الإعلان عن ذلك، ولا ما عرفت شنو كاين في علم رئيس الفريق عبدالرزاق إيغافي لي حتى اختفى مع المسيرين لي معاه وهو لي كان حقق الصعود مع الفريق 4 ديال المرات.
هاد الشي خلا رئيس المجلس البلدي عبدالسلام بلقشور هو لي سير الفريق بالنيابة عن باقي أعضاء الفريق بمن فيهم الرئيس عبدالرزاق إيغافي.
مجموعة من التساؤلات ولات كتطرح نفسها بقوة ومنها واش هاد الأعضاء غادي يبقاو في مختفون ورئيس المجلس البلدي نايب عليهم؟! ولا غادي يبقى حتى ينعاقد الجمع العام الاستثنائي لانتخاب مكتب مسير جديد مع العلم أن الفريق كي عاني من أزمة مالية خانقة.
هاد الأزمة خلات اللاعبين ديال النهضة يتسالو الصالير ديال شهرين مع عدم صرف الشطر الأخير ديال منحة التوقيع، بلاما نساو المدرب سعيد شيبا لي مشا لغرفة النزاعات في الجامعة لأنه كي تسال 54 مليون، أضف إلى ذلك المدرب يوسف فرتوت لي حتى هو كي تسال 42 مليون، هاد الشي نزيدو عليه عثمان العساس لي طلب الإعفاء ديالو أمس الاثنين لأنه ما بقاش مرتاح وما بانش ليه معامن في الصراحة بسبب الغياب الكلي ديال المكتب المسير يعني مكاينش لي غادي يشرف معاه على عملية انتداب اللاعبين وتحديد لائحة المغادرين فما كان إلا زاد فحالو كيفما زادو لي قبل منو.
مشاكل نهضة الزمامرة لا تقتصر فقط على الفريق الأول ولكن واصلة حتى الفئات العمرية لي كي شرفو عليهم مؤطرين لا تتوفر فيهم الشروط المطلوبة حنت عندهم رخص C و D مع العلم أن الجامعة الملكية المغربية لكرة القدم تشترط ضرورة توفر مؤطري هاد الفئات العمرية على رخصة تدريب B.
كنت باغي نسالي هنا ولكن تفكرت واحد النقطة حتى هي مهمة وهي كلشي مشا من النهضة بمن فيهم المكلف بالتواصل والشركة المكلفة، وحتى حامل الأمتعة السي عبد الجبار نفوس لي لعب في الفريق مدة 15 سنة وخدم معاه مدة ديال 20 سنة يعني المجموع 35 سنة بالفريق.
فإلى أين يسير فريق نهضة الزمامرة؟!